"LAL NA TEPEL, TEPEL BAA NA HONE, LAL NA BELEK, BELEK BAA NA SASI" (Mat 5 : 37 )

Homili 

P. Lazarus Mau SVD

Pada Misa Syukur 

P. Benediktus Bere Mali, SVD

Asueman-Malate, Selasa 5 Oktober 2004

Baa gie ba Yesus lolo gol wa uen gene mit so, en ganorin. Lal goq bais halai gege , hini guni gene, hini guel gene. Gini mak loi, gini tara loi. Ata hua gene pagaq gie, hua gene hoon gie. 

Lal go ginat bare goet.. Sorti masak eina susar, eina memel, eina soat, eina kiak, eina en ege sok sawa tan no piar, tan Maromak giol jal. Pan Esen ei ie. Huagene bare goet teni . Ei hotu-hotu na nua gene, ei E muk wa gie. Bai a, si uor hini mami. Ei mos guel mukwa gie. Ei mesti barut cia goet, lantera leno goet. Homona en hotu-hotu himo ate rein gene ie hoon loi, ie hoon koen ba hajal, terel Ama esen gaqmen gasae gie. Yesus halai gubul gael no toek noq masak bare lai teni… Lal na tepel tepel baa na hone. Lal na belek, belek baa na sasi. Kalau agar no tepel, belek na sasi, baa diabu go gene man, kukun gene na sai. Baa goet on, late ata na mal, kukun ata na pagaq. Ei hani baa goet. Nego na loi, loi, nego na late, late. Nego na belis, belis, nego na guju, guju. Bare mesti hini irak-irak, hini doloq-doloq gene…

Serani Loi ginil.

I bare waen dimil pir niq gie wen. To mil uen hiloon mil bare no guru agama gol hiloo sai nai lulik oa. Romo Yustus, guru agama Tahon, Matas Kobus gol. ( O Romo Yustus bi gubul koun goet be, obi matas Kobus gol on nai, hani gini gie kauq on ). 

Pater Bene, guru agama Asueman gol, Bapak Gabriel na I ewen no mit bari.Nai lulik hone gie ata hou haal baa no Pater Bene dege Hot giol, dege Hul Giol uen hukat, hini dawas no gie-hini dimil no gie, baa hone dele, bare jati dele die serbisu nailulik gie huagene hoon gie. Sasi bare goet .. Lal na tepel tepel baa na hone, lal na late late baa na sasi. Kalau eto hou haal oa, hou hini liol. Hani dagar belek, hani diol belek hoon toil. Kalo eto puluk, hani tebe dojul a. 

Ota muk Lamaknen bare no, hue muk Asueman Aitoun mil bare no, Nakalolo, Telolo, en na guru agama, matas Kobus o bapak Gabriel halai bari goet, neto rimil gagal soat gie wen oa (sama seperti yang dikatakan orang .. pria jujur sulit dicari, atau wanita yang u.u. sulit didapat). 

Pan lele, muk lele, en iskola masak, en matenek hotu, gini katekis, gini pegawai serbisu kantor na sagal, kansera masak na wau. Dini mele tara niq oa, dini kura sae loi ni oa. Bis na sae gie, ojek na sae gie. Esen Gereja Nualain hini ate mo iti gene goet, Gereja Fulur hini ate Lakaan wa gene goet. Hini ate oa dilek tuek oa.Pagaq gie go loi niq oa, mal gie go tuek oa. Pada hal lain tutu gene I hotu-hotu bare baagene dini kereq dini uen. Ate hini ate niq, koleq dini koleq niq. Inel hini inel niq, naka hini naka niq. 

Memang le le muk maju oa en sasi gie na baa gin. Balu dewen mal, balu dun mal. Mais en na guru agama, baagie ba, to’o mete hot mil serbisu Maromak gie hone, ate tara niq, koleq tara niq. Kalau jumat niat, halai hotu-hotu Paroki gene Rekoleksi hoon. Lei gie mel misa haal, halai minak muk botil uen-uen hosok (die botil jal gimen, botil gagar dio a – dio a bun, botil gar – gar bun ), bako jun gol uen, molo pu gol uen baa na hosok ai. Hosu neto hajal ni. (Arine lele bare Rekoleksi baagoet hati e niq neto tara niq oa. Tekil gie hoon hosu on oa. Lele bare Nailulik halai guru agama gege tumel gon uen gon no e niq ba’a mos neto tara niq oa). Mete ba’a haal so halai die tas ata tebe, die serbisu hone hoon diemien. En halai na bari taq. Derel go sura.Hot mil uen gie matas guru agama uen dol mone go sura bare goet .. apa e,... leigie bare hot mil nego, tanggal tuen-tuen.... gol mone himo go hosok bare goet.. hae ama, ... eto bare ene tanggal le tanggal, kansera bun hosok gie ka? ( Hele Pater Bene bari na die ama go hosok baa goet? Ini aen gie ka? Memang gol ginil tara pisi ama kansera a niq. Halai mos gagar giol hobel, Tekil lele serbisu ba’a goet on bu an meren na hosok gie nai. Hala’i dimil los ai, jonal gene man pan esen gene na hosok. Memang hala’i serbisu los ai. Ota ba sura, bare sura hobel. Gagar giol hobel, sesuk lesik nor gamak niq, sok sawa apalagi, die serbisu Maromak gie ata na gon giri libu. 

Memang toek noq hini moto ba’a hala’i hoon niq apalagi jiq koen-koen honal bare goet. Lele bare kalo en uen kawen, tenda mil gene e, kamar pengantin mil gene e, I tulisan hajal: Dua hati satu napas, dua napas satu jantung..... Satu kubur kita berdua.... Ya oik-oik.... matas mil giol no be.... o bare toek e rale.... Jonal gene man tepel e niq I ata hajal. 

Guru agama ginil dimil bais niq. Halai dimil los ai : Hot gie serbisu na ba’a, Hot giol tepel na baa, ata hou haal, hini topol niq, hini muk no niq. Hosok haal oa-hepu haal oa, baa dele mele, baa dele mal, tas-tas lolo, deu-deu lolo. Hot giol baa en gini mak gie, en gini hua gene gie. Halai ata matas na baa, ata touq na baa. Ewi giol no be “halai YA, ya baa ai” gubuq-gubuq, goq-goq hobel.

Serani loi ginil. 

Bul nego ata na mete bare, neto dale guru agama gie na dale hanesan kaset uen goet I ege gapal, hini tebe mak, hini tebe tara teni? Nego na loi tentu en hotu-hotu mobel. Nego na Maromak giol gutu terel mele niq I mos o roon toil gie. 

Mais neto mos Pater Bene go sura, nego on na, eto moto bare dege poi dege hukat? Sasi : “Lal na tepel, tepel baa na hone... Neto dimil, ho ama gie, kaluk ama gie, lal ama gie na ita leleq o pir na baa. Ama ege hik sen, ama ege ua sen, ini gere-gere, ini gua gene gie. Giri gua na baa, gon gua na baa. Ini hone gie, ini huagene gie. Bare lal tuek bun. I hue gene tepel – tepel gie ka niq? I hoon heta gie ka niq. Hani diol hini na ro lesin, hoon gene hesik sa niq, hik hosu na hone, sorun hosu na mal. 

Hot mil uen gie Nailulik Projo uen SVD halai gotol diol wa bare goet. Halai na kaul hoon, mais nei na hua gene hoon. Mereka berkaul, kami menghayati. Neto rimil waen tepel goet ba.... Mais I irak-irak. 

Ba’a gie na serani loi ginil mos nei nita hamulak. Hani pesta haal o si nei ret nile’e los. Mete nei na rahul, jonal gene man nei notol sagu-sagui na hoon, dagar hini sae rebel-sae rebel hanesan sie gebu goet. Nego na tepel baa hone tama, nego na belek, belek ba’a hini irak-irak. Kalau I kahul, bare diabu I alak tama, late ata na I ajati gie. En na gepal hati ilek mal, en ciona gimil hati hadomi mal. 

PASTOR LAZARUS MAU, SVD Berkotbah tentang Moto Tahbisan P. Benediktus Bere Mali SVD: LAL NA TEPEL, TEPEL BAA NA HONE, LAL NA BELEK, BELEK BAA NA SASI (Mat 5 : 37 ) dalam Misa perdana P. Bene pada hari selasa 5 Oktober 2004, di TELOLO, MALATE, Lingkungan Asueman - Paroki St. Theodorus Weluli – KEUSKUPAN ATAMBUA-Timor Barat - Indonesia.